KDAOMBARAMITA

Ketaka n°4

kdaombaramita — Mon, 28 Dec 2009 09:27:45 +0400

AOKA ALOHA

Alahady maraina tamin’izay. Raha mbola teo ampihomanana handeha hivavaka i Ketaka, dia naneno ny finday :

- allô ?

- manahoana i Ketaka ? I Harena ihany ity.

- Hay, manahoana ianao. Tsy mbola hariva anie ny andro e ! hoy i Ketaka nananihany. Sa misy fiovam-potoana ?

- an an an, mba te-hahazo vaovao vao maraina avy aminao aho. Tsy dia nahita tory loatra aho alina nieritreritra anao, tsara tarehy anie ianao ity e !

- hayyyy, ianao koa dia manatsafa loatra, toy ny rehetra ihany aho re ! Miala tsiny fa tsy afaka ny hitafa ela aminao aho fa efa miandry ahy ny ato an-trano fa handeha hivavaka izahay.

- eny ary e, rahariva an ! tsy andriko ery izany hiara-hitsangatsangana aminao izany. Veloma I Ketaka.

. . . . . .

Injay nisy nandondona tao ambaravarana, reniny no namoha :

- manahoana tompoko, ao ve i Ketaka izay ?

- Iza moa ianao raha tsy mahadiso ? Izaho no reniny

- I Harena tompoko.

- Hay, ilay hiaraka aminy ho eny Ivato ? Andraso fa antsoiko izy, mandrosoa ianao dia mipetrapetraha ary aloha.

- efa ity aho ry mama. Izy no Harena iray kilasy aminay, ary izy no ray aman-dreniko.

- faly mahafantatra, hoy rainy, fa aiza ianao no mipetraka ?

- Any Analamahitsy tompoko, fa ny raibeko no mipetraka efa elabe etsy Andravoahangy ambony eo akaikin’i “Tsiro”, ilay trano biriky menamena. Dia any aho no mody mandritra ny herinandro rehefa fotoam-pianarana

- Hay ? Sao ingahy Rabesata no anarany ?

- izy indrindra.

- hay zafikeliny ise e ! ise ve izany zanak’i Voahangy vavitokany e ? Mpiara-milalao aminay izy iny fahiny, hoy rainy.

- Voahangy tokoa no anaran’ny reniko. Hay mifankahalala ianareo ?

- ie, nisy fotoana izahay mpiray tanàna teto no niara-nilalao dia rehefa harivariva mandeha mividy gilasy ery amin’ny “Fleur de neige” ery Ampandrana. Nahafinaritra tokoa I Voahangy fa tia namana sy sariaka.

- dada, mila mandeha izahay fa tokony ho tonga eny Ivato amin’ny 3 ora.

- eny ary e, aza alim-pody loatra ihany na izany ary. Mitandrema tsara amin’ny fifamoivoizana fa be ny olona @ izao krismasy efa manakaiky izao.

- eny tompoko, aza matahotra ianareo.

Dia lasa nandray fiara ireto tanora.

- hay, tsy nampoiziko indray iny hoe mifankahalala ny ray aman-drenintsika, hoy i Harena. Misy ho tantaraina amin’ny neny iny an !

- izaho koa mba gaga !

- natory tsara ve ianao tamin’ny alina ry Ketaka ?

- ie, natory tsara aho ka, hoy razazavavy nanafina ny fahafaliam-pony sy ny fanontaniana niboiboika tao an-tratrany saika tsy nahandrasany ilay fotoana.

- izaho tsy natory firy anefa nieritreritra anao, hoy ny valiny sady nitsiky nangalam-pijery azy. Saika hiantso t@ finday mihitsy aho saingy efa tara loatra!

Dia nitohy resaka fianarana ny namenoana ny dia, ary betsaka tokoa ireo hevitra nifandraisany. Samy miomana ho mpitsabo moa izy ireo koa dia tsy nahagaga raha nahita resahina ny momba izany.

. . . . . .

Nony efa tafainga ny fiaramanidina dia nandeha nisotro zava-pisotro izy roa :

- misy olona miaraka aminao ve izao ry Ketaka ? sao dia misy mahita ka sao ahitàna angano

- tsia re ry i Harena a, ianao no asa, sao dia lazain’ny olona fa miaraka isika.

- maninonamoa raha lazaina ary fa miaraka isika ? tsy mampaninona ahy aloha e ! Fa tsy manana sipa izany aho ka. Vao mitady, hoy izy nibanjina azy.

Niondrika i Ketaka nahare izany, nidoboka ity fony no somary menatra izy.

- Ketaka, menatra angaha ianao ?

Tsiky no nasetrin’i Ketaka izany, sady nangovitra ny tanany.

- mbola tsy fantatrao ihany ve ry Ketaka fa . . . misy olona miaraka amiko izao ?

- Hay ? ka sao dia ahitan-doza ary fa aleo tsy be mpahita toy izao e ! Na ireo namanao teo azy toa nanontany maso anao daholo nahita ahy koa !

- Ketaka, tsy mampaninona izany. Sady noraisiny ny tanan’i Ketaka no notazoniny. Misy olona miaraka amiko eto akaikiko izao. Sady efa ela no nandinihiko azy, fa izao aho vao afaka miresaka malalaka aminy. Fantatrao ve hoe iza izany e ?

- eny e, izaho irery no eto akaikinao izao, hoy ikala nihomehy. Izaho anie tsy mbola mahay tsara ny momba anao e. Mpiray kilasy isika no niara-nijery sinemà omaly dia izay.

- Ketaka a, mbola tsy dia hariva loatra ny andro fa raha tianao dia afaka ny mandehandeha miresaka ery amoron-dranon’Ambohibao isika na folo minitra fontsiny ary.

- . . . . 'ndao ary e, hoy i Ketaka somary nihaotratraotra ihany, nefa nanaiky nony nieritreritrafa mifankahalala ny ray aman-dreniny.

Afaka 15 minitra dia tonga teny amoron-drano izy roa, betsaka ihany ireo olona no mbola manararaotra ny harivariva manjono sy mbola tsy maika ny hody.

- Ketaka, efa fantatrao ny anabaviko. Akoatra izay dia efa niaraka tamin-javavavy izay aho teo aloha, eny e, raha azo lazaina ary hoe niaraka izahay satria tsy naharitra akory ny fiarahanay. Tokony ho 1 volana teo dia niaraka tamin’olon-kafa izy, ary nilaza tamiko ny marina. Izaho koa moa tsy dia niraika loatra taminy ny fitiavako ka tsy nampaninona ahy.

- fa rehefa ahoana dia miraika ny fitiavanao ry Harena ? ary manao ahoana izany ?

- Ketaka, misy zavatra mampanintona ahy aminao, sady nanakaiky ny tarehiny izy, efa ela no naniriako ny ho eo anilanao toy izao. Tsy tsapanao ve izany e ? Ketaka a . . . . . .

Nanoroka azy moramora teo amin’ny molony izy, toa nanaiky norohany koa i Ketaka, ary dia hoy ny eritreriny hoe : “miaraka izahay”. Naharitra segondra vitsivitsy izany ka raha tsy voadona ilay fandefasana kapila mangirana nandefa ilay hira hoe : “Endless love” no nampisaraka moramora azy ireo.

Nitokelaka izy roa, hoy i Harena :

- misy ahatsiarovana izao fotoana izao izany hira izany.

- Harena, tsy mbola niaraka tamina tovolahy izany aho.

- matokia ahy ianao fa tiako ny manaja olona

Nifamihina indray izy roa, toy ny vetivety, nefa ny andro efa nanomboka ho maizina.

- andao isika hody fa efa miandry izay i dada sy i mama.

- eny ary e.

Nizotra moramora namakivaky ny vahilava, nihazo an’Ambohimanarina sy Ankazomanga. Faly ery ny maso nijery itony jiro miloko maro manaingo ny sisin’arabe sy eran’ny mpivarotra. Efa akaiky ny krismasy tamin’izay.

- Ketaka, matoky izay voalazako ve ianao e ?

- eny, matoky aho, hoy izy nitsiky malefaka, nifandray indray ireo tànana tao anaty fiara. Fa izao : ny fiaranarako dia tsy ho ataoko ambanin-javatra na dia eo ary ny fiarahantsika, tiako ho tafavoaka ho dokotera aho ry Harena, izay no kinendriko eo amin’ny ho aviko.

- ho avintsika izany ry Ketaka. Izaho koa te-hamita ny fianarako. Aza manana ahiahy ianao fa tsy hanakana ny dianao aho akory. Vao maika ary ho tafara-dia isika satria mitovy ny atao, iza mahita any aoriana any !

Tonga sahady teo Mahavoky ny fiara.

- Ianao izany hody any Analamahitsy izao ?

- ie, tsy maintsy mody any aho fa mbola any ny fitaovako sy ny fitafiako amin’ity herinandro ity.

- Harena, rahampitso indray isika mihaona ny Ankatso an ! veloma ianao

Tsy naharitra i Harena fa avy hatrany dia nanoroka azy sy namihina azy alohan’ny handehanany :

- Ketaka a, tsy andriko ny rahampitso ahitana anao.

Lasa i Ketaka nody moramora sady nikopa-tànana azy tery lavitra tery. Ny finday no nanaitra azy vao niditra ny trano :

- manahoana indry ry Ketaka, i Lalaina ihany ity e.

- inona akia no vaovao a ?

- any amindry izao no misy ? nanao ahoana ny sinéma ?

- tsara ka, mandehana anie jereo e !

- an an an, tsy izay no tiako ho lazaina akia !!! Ianareo sy Harena ?

- hay indry ity koa mba tena te-hahalala be ka ! nahafinaritra akia izy sy ny anabaviny a ! Dia androany izahay niaraka teny Ivato nanatitra ny namany.

- dia ahoana ?

- izao ary e, sady nihomehy kely i Ketaka, miaraka izahay !

- miaraka a ? mifampisipa ve ?

- eny akia!

- fa ahoana no anaovandry izany ? f'angaha . . . . .

- mifankatia akia izahay a, raha tiandry ho fantatra bebe kokoa akia dia nifanoroka izahay androany.

- io akaikiko io i Solo e, renay daholo izany akia. “Beau couple“ kosa ianareo roa koa !

- ny fianarako aloha akia izao no tsy tiako atao ho ambanin-javatra. Rahampitso hariva ilay hiaraka hianatra isika telo an, aza adino ! Sady hikarakara ny dossiers any amin’ny hopitaly koa sao tara loatra.

- eny ary akia. Rahampitso miresaka bebe kokoa !

- Veloma akia.

Roa herinandro taty aoriana an-katoka ny krismasy. Nitohy ny fiarahan’i Harena sy i Ketaka, mifanao fotoana mianatra koa. Ary lasa mpinamana izy efatra mianadahy. Talata ny andro ary teo ampiandrasana an’i Solo sy i Lalaina i Ketaka sy i Harena tao Andravoahangy ambony. Injay niantso i Solo nilaza fa tsy ho afaka fa voatery miandry trano, ary toa nanambara koa fa mety tsy ho tonga i Lalaina fa toa milaza marary. Niantso i Ketaka naka vaovao momba an'i Lalaina :

- efa amin’ny 2 ora sasany anie izao e, tamin’ny 2 no fotoana sao adinondry

- tsy ho afaka ny ho tonga aho akia, efa teny an-dàlana aho no niverina fa mahatsiaro ho fanimpanina, voan’ny gripa.

- hay, aza manam-be ary akia. I Solo koa tsy ho avy fa efa niantso teo. Izahay sy I Harena irery izany sisa. Makà aina tsara akia fa efa akaiky koa ity ny fety a ! Avelako ary indry hiala sasatra e !

Nilaza ny vaovao tamin’i Harena i Ketaka nony avy eo. Ary dia niezaka nianatra izy roa.Tokony ho efa tamin’ny 4 ora teo dia nanomboka efa reraka ny sainy ka nandeha ny karajia sy ny tokelaka. Ary dia tapa-kevitra fa hajanona aloha ny lesona. Rehefa samy nihomehy teo dia niafara tamin’ny fanorokoroka. Toy ny natao ho azy ireo irery koa ny trano fa nifanojo tamin’ny nandehan’ny raiben’i Harena tany ambanivohitra. Nanafosafo ny endriny ery i Harena no nandinika azy.

- tsy mbola nahita tovovavy tsara endrika toa anao aho ry Ketaka, sady norohany indray.

- Harena

- ahoana izay ?

- sao lasa lavitra lahy izao ataontsika izao, fa andao hivoaka, sady efa hiverina koa izay ny dadabenao.

- dadabe tsy miverina raha tsy rahariva ka, izay no nahatonga ahy niantso anareo hianatra ato an-trano androany, tsy ho voahelingelina. Matahotra ve i Ketaka ?

- Harena, hainao ny tiako lazaina. Na izaho na ianao mety samy tsy hahatohitra ny fankam-panahy.

- Ketaka, ateriko ianao rehefa avy eo. Tsy mbola ho tonga izao i dadabe.

Nosafosafoiny ny volon’i Ketaka sady nifanoroka izy roa, nangoro vitsika i Ketaka. Tovovavy tsy mbola nahalala fitiavana izy, nakafy ny safosafo sy ny oroka nataony. Nibitsika moramora tao an-tsofiny i Harena nanambara zavatra mbola tsy reny hatramin’izay niarahany :

- Ketaka, tsy mbola nitia olona toa anao aho, ary mbola tsy nanao toy izao tamin’olon-kafa afa-tsy ianao

- Harena, nefa nilaza tamiko ianao anefa fa efa niaraka tamin’olona teo aloha

- eny e, fa hoy aho taminao fa “raha azo atao hoe niaraka ary” satria tsy naharitra ela izany, tsy nikasika azy toy izao aho, ianao no olona voalohany ataoko toy izao

- Harena, izaho koa tsy mbola nanaiky nataon’olona toy izao raha tsy taminao.

Nangina ho azy ny molotr’izy roa sady nifanena indray. Injay toa namaha ny bokotr’akanjon’i Ketaka i Harena no taitra tampoka ikala.

- Harena, tsy mbola vonona aho. Nataoko ho an’ny vadiko ny fahadiovako.

Sady natosiny moramora ny tanany.

- eny ary fa hanaja anao aho. Marina ny teninao.

Samy tsy nisy niteny, re nanidina ilay lalitra tokana, toy ny samy menatra. Harena no namaky ny fahanginana voalohany :

- aza matahotra ianao fa na ny ray aman-dreniko koa ary mananatra anay ny momba izany. Eto aho vao mahatsapa fa sarotra ihany ilay mitandrina, tsy araka ilay hafatra fontsiny. Handao haka rivotra handehandeha isika roa.

- eny, izay no mety angamba !

Indreny ny olona mitanjozotra avy niasa, mamonjy mijery bazary noely. Nanararaotra koa izy roa nifampitantana tsy ho tafasaraka. Toy ny vao maika nanamafy ny fitiavany ny hevitra nomen’ny ray aman-dreniny azy ireo momba ny fiarahan’ny tanora. Nampirimin’i Ketaka tsara tao anaty kitapony indray ilay karatra misy soratra “aoka aloha“ nozaraina ho an’ny tanora. Ary dia tsiky no nasetriny ny eritreriny niteny hoe : "soa ihany" nony tao am-pandriana izy. Tsy adinony ilay hira fony izy nifanoroka voalohany, ka nohenoiny teo ampitadiavana torimaso.

Ketaka n°3 (update : mandihindihy i kala ato LoL)

kdaombaramita — Wed, 09 Dec 2009 20:30:11 +0400

FITIAVANA SA FIHETSEMPO MANDALO ?

Zoma alina tamin’izay, efa manomboka ny faran’ny herinandro, nefa mbola hianatra i Ketaka ny sabotsy maraina. Koa tsy naharitra h@ 11 ora sy sasany izy fa vao vitany ny lesona momba ny lalàna dia natory avy hatrany izy, mbola hianatra vao maraina. Rehefa avy nanapika jiro izy dia indro nitamberina tao an-tsainy ny resany tamin’ny namany teny an-dàlana, momba ilay trano misy matoto etsy Ankadifotsy. Manangatra tokoa moa izy io araka ny tantaran’ny maro, ary nanamafy izany ny fitantaran’i Lalaina :“ny rihana voalohany no tsy azo ipetrahana mihitsy, indrindra amin’ny alina fa raha matory ao dia eny an-tokotany no mifoha maraina, izany hoe misy mibata eny hono”. Natahotra mafy ikala nieritreritra izany, ny andro alina rahateo koa dia norakofany lamba lohany mba hanafana azy haingana ahitany torimaso.

Feo niantso tampoka no nanaitra azy nony efa tamin’ny 3 ora maraina. Nitomany ity zandriny ka nifoha izy nampangina azy :

- Ketaka, Ketaka, aza ilaozana aho fa matahotra !

- ssss, mangina fa maninona ianao ?

- aza ilaozana aho fa matahotra

- manonofy ianao fa matoria. Eto akaikinao ihany aho fa tsy lavitra e !

Rendriky ny torimaso indray ity zaza nangina tampoka, tena tao anaty nofy tokoa. Ity zoky vavy kosa niverina naka torimaso koa. Injay anefa nisy nandehandeha tao an’efitranony. Feona dia tongotr’olona mandehandeha manao kapa “scoubidou”. Tsy misy manana ireny anefa ao an-trano. No tao anaty aizina koa ilay izy. “I Mama na I Dada angambany izany nahare an’i Fanilo nitomany teo, nefa toa tsy fombany ny mikiraro ao an-trano”. Rehefa nieritreritra kely izy dia raiki-tahotra ka nasitriny ny lohany tao anaty bodofotsy. Tsy sahy nitsikilo intsony izy. Afaka 5 minitra teo dia tsy nahare inon’inona intsony izy. Navoakany moramora ny lohany tao anaty aizina, nosokafany tsirairay ny masony, ka … injay feo nandondona mafy ny rindrina teo akaikiny avy aty anatiny no henony ary io misy vaingan-javatra boribory maitimaity mivezivezy eo amin’ny rindrina manome ilay feo.

- “Tena matoto ity”, hoy izy anakampo.

Saika hiantsoantso mafy :

- “Dada a aa !”, nefa tsy tafavoakany ny feony fa toy voahidy mafy ireto molony roa, toa tsy hainy ny nanokatra azy na dia nampiasa hery ary izy. Tsaroany tampoka ilay teny tamin’ny toriteny tany ampiangonana hoe : “antsoy Jesosy @ androm-pahorianao fa hamaly anao izy”

- “Jesosy ô, ampio aho, reseo io matoto io Tompo ô” , hoy ny vavaka tany an’eritreriny … Poa toy izy dia nijanona tokoa ilay dobodoboka ary nanjavona ilay zavatra.

Mbola tafatory kely izy nony avy teo mba hamono eritreritra hiatrika ny andro vaovao. Nefa tsy naharitra ela izany fa voatery nahandro vary sosoa sy nanendy kitoza izy ny maraina atao sakafo.

Rehefa tafahomana, izy dia nifanena tamin-dreniny :

- maika aho fa tara, toa efa nifoha i Fanilo ao raha tsy diso aho

- fa nisy inona retsy iny maraindraina iny no nitomany ilay zaza ?

- nanonofy ratsy fontsiny izy angambany, ho tantaraiko aminareo ny nahazo ahy rehefa tafaverina aho, fa lasa aloha sao tara, "bonne journée" mama sy dada. Efa ao ny sakafo maraina.

Raha teny ambony fiara fitaterana izy dia nitady izay zavatra hanalany andro @ ity sabotsy ity. Tapa-kevitra ny anao vavy fa “hitsaty” @ ireo namana amin’ny internet, manantena ny ho tafaresaka amin'i Marina, Beby, Raedy na i Maeva. Nikasa hijery sary mihetsika koa anefa, asa raha mba misy namana afaka miaraka.

- manahoana i Ketaka, injay feo nanakatra hiresaka aminy

- manahoana ianao, hoy izy nitsiky t@ ilay tovolahy iray kilasy aminy teo akaikiny

Tovolahy tsara endrika, ranjanana, zarazara hoditra, mirijarija fitafy, maotina nefa sariaka i Harena.

Dia nitohy ny resaka :

- inona no vaovao ? Hainao ve fa nivoaka androany ilay film 2012 ? niresaka be avy hatrany.

- tranon-tsinemà aiza no misy azy ? izany ve tsy ilaharana be ! hoy i Ketaka

- izay aloha e ! Izaho hijery hiaraka amin’ny anabaviko rahariva, mbola misy tapakila famandrihana iray aty amiko raha hijery ianao.

- an an an, izany mandeha irery izany tsy laitrako kosa ka !

- ka miaraka aminay anie no tiako lazaina e ! Sady nitsiky i Harena nijery azy nanontany.

- tsy mahasosotra ny anabavinao ve izany ?

- ka saika ho an’ny namany io toerana io fa tsy afaka tampoka ilay olona dia niteny ahy izy mba hitondra namana. Tsy maninona re izany e, mahafinarita anie ny zokiko e, ho hitanao rehefa miresaka aminy ianao. Sady mba te-hahafantatra bebe kokoa anao aho fa efa volana vitsy ihany izay nahairay kilasy antsika izay nefa toa mbola tsy nisy fotoana nifankahalalantsika hatramin’izay.

- izany tokoa moa ? eny ary e, amin’ny firy ny fotoana ? ary aiza ny ilay sinemà ?

- etsy amin’ny KANTO ilay izy, tsara raha eny no mifankahita rahariva amin’ny 3 ora sy sasany.

Toy ny olona efa nifankahafantatra h@ ela ireto tanora roa, tonga dia niara-dàlana sy tafara-nipetraka tamin’ny dabilio iray fa efa nanomboka ny fampianarana. Faly ery i kala nahita handaniana faran’ny herinandro aloha fa be loatra izay lesona izay, i Harena koa jenitra sy faly tafara-dàlana tamin’ity tovovavy mahafatifaty …

Tonga ihany ny mitatao vovonana :

- rahariva ary e, hoy ity tovolahy nanafatrafatra ihany sao diso fanantenana

- eny ô, misaotra mialoha

- Ketaka a, sao hody hiaraka aminay indry fa misy toerana iray ato anaty fiara ? hoy ny feon’i Lalaina sy i Solo etsy niandry azy.

- an ? ie, ho avy tokoa aho akia fa efa noana izany. Rahariva Harena a, mazotoa homana e !

- misaotra e !

Tao anaty fiara :

- miaraka angaha akia indry sy i Harena ? bôgôsy leiry iny an ! hoy i Lalaina nananihany.

- aiiiy, mba nasainy hiaraka aminy sy ny anabaviny hijery sarimihetsika fontsiny aho rahariva, hijery ilay 2012. Izaho koa moa efa ela no te-hiala voly koa dia tsy mampaninona ahy. Izy koa moa tsy ratsy rahateo e !

- Ha ha ha ! Niaraka nihomehy izy rehetra tao anaty fiara.

- toa vampira anie akia hono izy iny e, izay no maha-bôgôsy azy, manintona tovovavy tokoa ny endriny satria ny vehivavy matsiro rà kokoa ! hoy i Solo

- ka tandremo indry sao orohany amin’ny tenda fa izay no vita an ! Tsy namanay intsony indry raha lasa vampira, nanampy i Lalaina nangala-pijery nihomehy.

Toran’ny hehy indray izy rehetra !

…

Tonga ny tamin’ny 3 ora sy fahatelony, indro efa niandry ry Harena mianadahy.

- miala tsiny fa tara kely aho

- tsy maninona ka, somary tonga aloha koa izahay ts’inona. Izy no Tsiry anabaviko, ary izy no Ketaka mpiara-mianatra aminay

- faly mahafantatra an’i Ketaka, hoy ity tovovavy tsara tarehy nitsiky, malefaka fiteny no misy itovizana amin’ny anadahiny.

- torak’izany koa aho ry Tsiry, hoy I Ketaka nitsiky taminy.

Dia nijanona niresadresaka kely teo aloha vao niditra naka toerana izy telo. Tsara endrika sy bika tokoa i Tsiry, toa mifanahantsahana ihany izy sy i Ketaka. Tsy mahagaga ity tovolahy raha nanasa azy hijery sinemà.

. . . . . . .

Nitsangana ny rehetra, namonjy varavarana. Samy nitabataba ny fahitany ilay sarimihetsika daholo. Nihoro-koditra ny akamaroany satria efa akaiky io taona io.

- Natahotra be ve i Ketaka ? hoy Harena nanatsafa

- inona koa fa i Harena nangovitra mihitsy tamin’ny farany, hoy ny zokiny nihomehy nananihany azy

- tantara noforonina anie iny e, hoy i Ketaka. Amiko dia olona mahay mivarotra ny eritreriny ny nanoratra ireny.

- izay aloha e, fa ny toy itony tena nandaniana vola mihitsy ny eritreriny mba hisy hividy, hoy i Harena

- maika be angaha i Ketaka e ? hoy i Tsiry. Raha tsy maika indry dia andao aloha hisotro zava-pisotro kely alohan’ny hodiana, dia aterinay indry rehefa avy eo. Fa aiza indry no mipetraka ?

- etsy Mahavoky, tsy maika aho akory fa efa fantantr’i mama sy i dada fa lasa nijery sarimihetsika niaraka amin’ny namako.

- hay lalanay izany, izahay any Analamahitsy. Sady izahay mbola handalo any @ dadabe haka ny kahie-ko sy ny sisa fa mbola any, na ny fitafiako t@ ity herinandro ity ary mbola any daholo. Tsy lavitra ny tranonao ny misy an’i dadabenay, ao Andrahoahangy ambony, hoy i Harena

- marina izany, hoy i Tsiry, andao ary e !

Nifandona kely ny tanan’izy sy i Ketaka nipetraka nifanakaiky eo ampisotroana Fanta Classico, ary tafajanona kely segondra vitsivitsy. Samy mody tsy taitra, na dia somary nangala-pijery an’i kalakely ary ity tovolahy. Lany ny zava-pisotro, ary efa nanomboka ho maizina ny andro.

Tsy lavitra ny trano no nijanona ny fiara. Efa maizina ihany ilay elakela-trano, koa dia naniraka an’i Harena ity anabaviny hanatitra azy.

- veloma i Tsiry ary misaotra tamin’ilay sarimihetsika.

- ts’isy fisaorana. Amin’ny manaraka hisy fotoana hifankahalalantsika bebe kokoa. Aza mihafahafa mandalova any an-trano rehefa manam-potoana.

- eny e, hiezaka. Izaho koa anie tsy lavitra eto no mipetraka ka antsoy aho rehefa mandalo eto indry mba mihaona isika. Sady dadabenareo izany tsy lavitra akory.

Dia lasa nanatitra azy i Harena, ary nony tonga teo ambavahady dia nifanao veloma nifanome tànana, naharitra no nitazonan’ity tovolahy ny tànany,

- veloma i Harena, amin’ny alatsinainy indray mihaona eny Ankatso

- Hono ho aho, sao dia afaka ianao rahampitso hariva e ? Handeha hanatitra ilay namako be eny Ivato aho fa handeha hanohy fianarana any Canada izy, toy ny mpirahalahy izahay ka ho toy ny ankizy milalao vovoka irery aho rehefa lasa izy. Andao hiaraka amiko ianao raha afaka. Amin’ny 3 ora no tokony ho tonga eny.

- tsy haiko fa antsoy amin’ny finday aho rahariva. Satria toa fivoriam-pianakaviana izahay rahampitso, raha tsy diso aho !

- Ketaka, tonga angaha ny zokiko izany ? injay feo kely no niantsoantso azy nihazakazaka.

- izy no Fanilo zandriko. Rahampitso moa ilay fivoriam-pianakaviana ry Fanilo ?

- poika ! i dada niteny hoe tsy ho afaka indray hono ry dadatoa sy ry dadanaivo, ka tsy mety hono raha tsy eo ry zareo ireo ! Fa mbola hiresaka hono izy hatao @ alahady manaraka ilay fivoriana.

- eny ary e, halainao eto aho rahampitso amin’ny firy izany ?

- tokony amin’ny 2 ora eo aho mandalo.

Toy ny nalai-nisaraka ireto tanora, nororitin’i Haja moramora ny tanany no navelany rehefa tsy nahatakatra intsony. Tsiky malefaka no namalian’i Ketaka izany : “misaotra tamin’ilay sarimihetsika, rahampitso e !”. Efa lasa lavidavitra i Harena no niverina nanao bà kely azy teo amin’ny takolaka roa no niteny hoe :

- izaho no misaotra anao fa nahafinaritra ny androany ! Veloma i Fanilo, nanongo ny takolany ankavanana.

Nidoboka ny fon’i Ketaka, nientanentana izy niditra ny trano, feno hafaliana tsy hay lazaina tao anatiny. Namboatra saina teo izy : “An an an, namako fontsiny i Harena ka ! Tsara fanahy izy sy ny anabaviny, no sady tsara tarehy ! Inona ity mahafaly ahy ? Dia nanaiky norohony aho nefa tsy fombako izany na dia teo amin’ny takolaka ary ! Mpiara-mianatra fontsiny izahay fa tsy misy inona akory fa izaho koa no lasa lavitra eto !”

- tonga angaha indry ? tsara ve ? hoy ny rainy

- ie, tena tsara ilay izy fa mampieritreritra. Mandehana anie jereonareo sy i mama ilay izy e !

- manasa isakafo e, hoy ny reniny etsy mantsy azy 3 mianaka

- efa vonona sahady angaha ?

- ka naninona tsara hoe no nitomany i Fanilo t@ alina a ? hoy reniny

- nanonofy ratsy fontsiny izy ka. Fa izaho no nahita matoto avy eo !

- hay, dia ahoana hono ? hoy rainy

Nitantara teo i Ketaka. Nefa tsy ampihorohoroana intsony no nitantarany satria efa nisy zavatra hafa mahafaly ny fony.

- rahampitso aho hiaraka amin’io namako io ho eny Ivato hanatitra olona.

- hay, iza retsy izany ?

Notantarainy teo.

- aza dia maharitra hariva ihany na izany ary ! Namandry fontsiny angaha i Harena sa … ? hoy reniny mahamahana nahare ity fiarahana fanindroany roa andro misesy ity.

- mpiara-mianatra fontsiny izahay ka ! hoy i Ketaka somary menatra

- antsoy izahay rehefa tonga eo i Harena rahampitso mba tianay ho fantatra izy an.

- eny ary e!

Nampirina ny lovia teo ambony latabatra I Ketaka rehefa vita ny sakafo. Ary nandeha natory. Tsy afaka tao an’eritreriny ilay tànana nifandona segondra vitsy, toy ny naharitra elabe. Nitamberimberina tao an-dohany ilay tsikin’i Harena nisintona ny tànany. Fitiavana ve ? Sa namana fontsiny ? Sa fandrebirebena ? Sa … fihetsempo mandalo ? Fa dia nihirahira ny tao am-pony, hiram-pitiavana fandihizan’ny ray aman-dreniny ao an-trano mitondra ny lohateny hoe : “Veloma ihany”, tsy afaka tao an-tsainy teo ampitadiavana torimaso. Toy ny tsy andriny ery ny ampitso hariva ahitana indray ity tovolahy nitondra azy nijery sinemà. … Asa izay mety ho tohiny.

(tapitra ny redirediko androany )

I Ketaka n°2

kdaombaramita — Sun, 08 Nov 2009 19:14:54 +0400

SAIKA VOATETIKA I KETAKA

Andro vitsivitsy taty aoriana. Nody atoandro hisakafo tany an-trano izy. Toy ny mahazatra moa dia mody haingana mba ho tafaverina haingana, mba tsy ho tara any ampianarana sao hindrana lesona amin’ny namana indray ny hariva ! Dia indro nisisika ho tafiditra amin’ny fiara fitanterana indray. Tafiditra ihany ny anao vavy t@ ity indray mitoraka ity, tsy dia be ny ankizy nody moa no niafiany tao koa. Olona telo izy no nidina, niala teo Andravoahangy ambony, teo ampitan’ny Sekoly Rasalama. Nisongona azy ireo ilay fiara fitaterana lasa, mbola feno be ka mino aho fa nisokatra daholo izay ny mason’ny olona na lahy na vavy tao anatiny nahita an’i ramatoakely.

Tampoka teo, injay feo niantso azy :

- Eee, azafady anie akia, misy tataka be ny patalohan-dry aoriana, hoy ity tovovavy iray.

- An ? Aiza izany ? hoy izy sady niezaka nijery sy nitsapa.

- Eto, sady noraisin’ity niantso ny tanany napetrany teo amin’ilay faritra nisy loaka.

Hay tena tataka tokoa ilay pataloha. Saingy tsy tata-jaitra na rovi-damba akory, fa ……… hita be izao fa nisy nanataka tamin’ny "Gillette".

- Misaotra akia, hoy i Ketaka sady akona.

Akona tsy noho ny henatra ihany, satria tena teo amin’ny tandrifin'ny ny fitombenany ilay izy ka tazana koa ny nanolo sosona ilay pataloha. Akona fa rehefa nitamberina tao an-tsainy dia tsaroany fa olona iray avy no teo alohany sy tao aoriany tao anaty fitaterana, sady lasa eritreritra ihany izy hoe : “Soa fa tsy ny tenako no voaratra tao ! Asa izay nanjo raha izay no zava-nisy ! Ary maninona koa moa ny olona no misy ratsy toetra toy izany ? Dia tena misy tokoa ny marary saina mianatra eny Ankatso ve ? Faly ery ve izay ilay olona io nitazan-davitra ahy e ? Asa lahy !“ hoy izy anakampo. Dia iny i Ketaka nanao dia tongotra maika, sady nanakona ny taoriany tamin’ny kitapony.

Nony hariva efa folak'andro iny, tokony ho tamin’ny 4 ora teo ho eo, tapitra ny taranja tokony natrehiny androany. Iny izy nanatona ireo zatovo namany vitsivitsy niresaka tamin’izy ireo. Nifanao fotoana moa ireo hoe handeha tongotra hody dia mba miresaka eny an-dàlana eny no mba miala amin’ny mahazatra kely ny saina efa reraky ny fianarana. Eny ary fa dia raikitra ny hody tongotra.

Kli … kli … kli … naneno ny finday :

- allo ? Mama ?

- izaho ihany ity e ! Aiza ho aiza indry izao e ?

- efa hody aho fa somary tara kely fa handeha tongotra hiaraka amin’ny namako aho

- tokony @ firy indry no tonga mba asaiko miantsena kely hatao sakafo androany hariva fa tsy afaka aho fa somary reradreraka kely izany !

- vao miala aty izahay izao, fa inona anefa no tokony ho vidiana ary e ?

- saika hoe vary amin’anana izao no manafana tsara @ izao ririnina izao e !

- hay, tena tiako izany ry mama. Andraso fa vidiako aty ny fangaron’anana : anamamy, anatsonga sy anandrano moa ?

- ie izay mihitsy, sa vidiandry any rehefa mandalo ny tsenan’i Besarety indry ? Dia aza adino ny mividy voatabia iray toko, ny tongolo maitso moa efa misy ato an-trano.

- tsy misy adino ve izany ry mama ô ?

- inona indray moa no tokony ho adino eo ?

- ny hena atao aminy e !

- indry ity koa mba tenda-kanina mihitsy kah ! ha ha ha ! angaha ny ntaolo voatery mihinana hena @ vary amin’anana izany ? indrindra rehefa hariva fa mavesatra ny hena !

- hay y y y, mama koa, hoy ny feony niangoty, asio hena re azafady fa mba reraka koa anie izahay ankizy amin’ny fianarana e !

- an an an, efa misy saosisy ato ary e, raha tiandry dia hanendy kely vitsivitsy aho hatao laoka ary e !

- hay, vao maika tsara ! misaotra mama an ! aleo fa karakaraiko izany rehetra izany raha reraka i mama ary e.

- hay, miandry andry ary ny raharaha ato e ! rehefa avy eo retsy e !

Nitsiky I Ketaka nanapika ny findainy nitodika niresaka tamin’ireo namany. Samy niresaka ny laoka tena tiany sy ny fikarakarana izany moa izy ireo nanalàna ny dia. Ny an’i Tiana henakisoa sy vorontsiloza fatao andro fety hono, ny an’i Solo kosa ny “hors d’oeuvre” no tena hankafiziny indrindra rehefa iny mangatsiatsiaka avy nivoaka ny vata fampangatsiahina iny ilay izy, ary ny an'i Lalaina ron’akoho sy sakamalaho no tena ahazoany aina rehefa reraka iny fa ahatsiarovany ny fahazazany teny ambanivohitra. Ny an’i Ketaka moa dia efa fantantsika fa ny saosisy nisaotsaorany ny reniny teo !!! Teo Betongolo teo amin'ny "Infirmerie de garnisons" no nivily làlana i Tiana fa any Avaradoha no mipetraka ka nihazo ny toby miaramila R3A iny no làlany. Izy sy ireo namany sisa kosa nanohy hatreo Besarety teo akaikin’i mpivarotra “Tselatra”, ity roa vavy namany moa etsy Ampandrana no nody, ary i Ketaka nandeha niantsena araka ny hafatry ny reniny avy eo alohan'ny hodiany etsy Mahavoky.

Vao tonga tao an-trano izy dia ny hikarakara sakafo no vaindohan-draharahany. Io reniny mijery tranokala avy namaky ny “bolongan’i Jentilisa” fa tia manaraka politika koa mantsy izy.

- avia indry raha hijery ity, hoy reniny nahita an-janany tonga

- aiza ? noheveriko ho blaogin’i Jentilisa anie no fijerin’i mama, hay i Kdaombaramita ? Ie, efa fijeriko matetika io ka, misy mahaliana ihany indraindray !

- vao avy namaky ny Maresaka Veto mihitsy aho io, mahaliana tokoa ilay iakalahy io raha hamoaka hevitra ka ! I News2Dago koa tsy ratsy ny heviny.

- marina mihitsy izany, tena natao ho an'ny mpanaraka politika an.

- fa jereo ity poezia kely "Fiadiana tsara indrindra" napetrak'i Kdaombaramita ity anie, mahafinaritra ery ! Hoy reniny.

- ary efa itan'i mama ve ilay lahatsoratr’i Kdaombaramita mitondra ny lohateny hoe “Ianareo lehilahy ireto tena tsss … !” fa mahatsikaiky tokoa ilay tantara sy ny fifanakalozan-kafatra e, vakio anie ! Fa lasa aho aloha hikarakara sakafo avy hatrany dia mba malalaka rehefa avy eo.

“Notetehiny madinika ireo anana avy nosasana, ireo voatabia telo sy ny tongolo maitso koa, novoasany ny silaka tongolo gasy roa dia nototoiny t@ laona vato. Avy eo nendasiny aloha ny voatabia, narahiny tongolo maitso sy ireo voatoto, ary rehefa afaka dimy minitra teo dia narotsaka ireo tetik’anana mba ho mendy miaraka, nasiany atsasaka "omby volamena". Tsy dia nataony masaka loatra ireo na izany ary fa manjary maty ny otrik’aina entiny. Nataony ambony fatana ny saosisy avy notsindrotsindromina t@ sotro rovitra mba hivoaka tsara ny saosy alohan'ny anendasany azy. Natokony ny vary, ka rehefa masaka dia nafangarony @ anana @ izay, ary rehefa nangotra-tokana dia novonoiny ny afo. Ny sira, iny moa dia samy eny an-dovia moa no samy manisy ny azy, fa araka ny hafatry ny dokotera dia tsara kokoa ny sira manta noho ny mihinana sira masaka”. Matsiro tokoa izany vary amin’anana sy saosisy @ andro hariva an !!!

Rehefa vita izany dia nandeha nisaika mba hanala havizanana izy, no indro koa niditra ny trano ny rainy. Tafahaona izy efa-mianaka kely ny hariva teo ambony latabatra no samy nitantara ny zavatra itany avy ny androtr'io. Gaga sy sosotra ery rainy nahare ny nanjo ity zanany vavimatoa tao anaty fiara fitaterana. I Fanilo zandriny moa efa nanomboka nihidy ireto dobo kely roa ka tsy naharitra nihinana tsindri-tsakafo fa nobataina nankany am-pandriana fontsiny no niafarany.

Vita ny sakafo ary iny I Ketaka namonjy ny fandriany ao an’efitrano misy ny zandriny izay efa nanidina ny lanitra fahafito, nianatra lesona h@ iraika ambiny folo ora alina.

Tafandria mandry kosa ary ianareo izay mamaky ity redirediko ity ô !!!

(Hahita ny tantara kelin’i Ketaka ianao eny antsefatsefany eny rehefa tsy mahita soratana i Kdaombaramita. Izy ity dia fanazarako ny tenako manoratra @ teny malagasy fontsiny)

NB : Aza adino ilay lalao BOMBS 2009

I Ketaka n°1

kdaombaramita — Sun, 01 Nov 2009 22:33:17 +0400

I Ketaka dia itony zazavavy jejojejo itony , manao fitafy manara-damaody. Izay andalovany ny tovolahy miherika avokoa, maniry na dia ny hiresaka aminy fontsiny aza sao mba tojo izay taolan-tehezany izy ireny ! Izy moa mpianatra teny amin’ny ambaratonga ambony teny Ankatso. Azo lazaina fa be namana sy tia mivazivazy, tia misariaka amin’olona.

TENA NAMANA

Tonga ny hariva amin’ny 6 ora sy sasany. Indro nivoaka ny efitrano fianarana izy, toy ny rehetra. Efa maizina ihany moa ny andro satria ririnina t@ izay. Namonjy ilay toerana fiantsonan’ny fiara fitanterana ramatoakely. Efa bebe ihany ireo zatovo no niandry teo. Tsy ampy ireny fiara ireny rehefa mirava faobe toy izao ny mpianatra eny Ankatso. Koa azo an-tsaina fa rehefa misy iray miala any dia ifanenjehana ny ho tafiditra ao anatiny, maika ny hamonjy ny tranony avy moa ka tsy misy mifanome tsiny intsony. Anisan’ny mba nifandrombaka ny ho tafiditra koa i Ketaka tamin’ity indray mitoraka ity. Kinanjo moa sady nikisaka moramora ilay fiara fitanterana, ka ny tovolahy be sandry no nahazo vahana. Koa dia mazava ho azy fa niala maina izy. Io izy tafajanona, toa niondrikondrika irery tao anaty aizina. Niantso ireo namany toa nitady fanampiana .......... Hay nisy nanitsaka ny kirarony havanana, ka tafala teny an-tongony, maity ny lokony ka sarotra ny nahita azy tao anaty aizina. Niarahan’ireto zatovo vitsivitsy nitady ka indry tery lavidavitra tery no indro hita ihany. Nisaotsaotra ery ikala no sady niaraka nivanivany izy rehetra avy eo. Mana-namana tokoa i Ketaka manampy amin’ny fotoan-tsarotra!

(Hahita ny tantara kelin’i Ketaka ianao eny an-tsefatsefany eny rehefa tsy mahita soratana i Kdaombaramita. Izy inty dia fanazarako ny tenako manoratra fontsiny fa tsy hoe mifaninana amin’ny kalaza toa an’i Maeva74 ankafiziko indrindra akory )